Nakaabante na sa quarterfinals ang Filipina tennis star nga si Alex Eala sa Toray Pan Pacific Open human niya gipildi ang Australian player nga si Talia Gibson sa tulo ka sets—4-6, 6-2, 6-0—atol sa Round of 16 sa maong torneyo.
Nakasinati og hugot nga hagit si Eala sa unang set, diin nag-ilog pag-ayo ang duha sa puntos, apan nakuha kini ni Gibson sa iskor nga 6-4.
“Lisod ang unang set, ug aduna koy mga higayon; nahibalo ko nga kon magpabilin ang akong pokus, mas daghang oportunidad ang moabot kanako,” matod ni Eala.
Daling nakabawi ang Filipina tennis star sa ikaduhang set, diin anam-anam niyang gikontrol ang duwa ug nagpakita og mas agresibong dula—lakip na ang pipila ka ‘service aces’—aron makuha ang set sa iskor nga 6-2.
Sa mahukmanong ikatulo nga set, hingpit nga gikontrol ni Eala ang dagan sa duwa, gidominar ang aksyon, ug wala niya tugoti si Gibson nga makadaog og bisan usa ka ‘game’. Gitapos niya ang duwa sa iskor nga 6-0, nga nagseguro sa iyang lugar sa quarterfinals.
Human sa duwa, gipahayag ni Eala ang iyang pasalamat ngadto sa mga Pilipino nga mibiyahe paingon sa Japan aron suportahan siya sa personal. Nagsaad usab siya sa iyang mga fans nga makita nila siya pag-usab sa sunod nga hugna sa torneyo.
