Gisuportahan sa mga magbabalaod ang pamahayag ni Presidente Ferdinand R. Marcos Jr. nga gikinahanglan ang pagpalambo ug pagpalig-on sa higher education.
Kahinumduman nga atol sa National Higher Education Day Summit, ang PBBM niingon nga daghan pa ang angay buhaton ilabi na sa higher education sector.
Kini human nga walay unibersidad sa Pilipinas nga nakasulod sa 100 Times Higher Education 2024 Asia university rankings.
Gani, ang Ateneo de Manila University nga naa sa ika-84 nga puwesto sa miaging tuig nahulog sa 401-500 bracket.
Matod ni Lanao del Sur Rep. Zia Alonto Adiong, mao kini ang rason ngano nga ang pag-abli sa higher education ngadto sa langyaw nga pagpanag-iya gipasiugda ubos sa economic charter change gawas sa pagdugang sa pundo.
Giinsister ni Adiong nga panahon na nga ablihan ang nasud sa langyaw nga pagpanag-iya sa mga unibersidad aron makatampo usab kini og dugang kahibalo ug benepisyo alang sa sistema sa edukasyon ug makasunod sa kalidad sa edukasyon sa ubang kanasuran.
