Natuldokan kaganihang buntag, Mayo 27, ang gipahigayon nga selebrasyon sa mga Muslim atol sa Eid al-Adha o ang “Feast of Sacrifice,” nga gipahigayon sa Plaza Independencia ning dakbayan sa Sugbo.
Atol sa maong kalihokan sa mga kaigsuonang Muslim, adunay nahitabo nga morning prayers alang na sa pagsugat sa Feast of Sacrifice, kung diin basi sa pagtuo ug tradisyon sa mga kaigsuonang Muslim, ilang gihimug-atan ang ka andam ug willingness sa usa sa ilahang mga propeta nga si Ibrahim o mas nailhan nga si Abraham.
Kini gumikan sa iyahang pagsakripisyo sa iyahang kaugalingong anak nga lalaki nga si Ismael, hinungdan nga gitagaan kini og pasidungog pamaagi sa mga selebrasyon nga molanat og upat ka adlaw sugod karong adlawa.
Sa maong selebrasyon usab, ang mga Muslim magtumba og baka o ba kaha kanding o tupa, dayun pagasaw-an sa ilahang matag pamilya, kasilinganan, o sa mga kabos.
Samtang, sa eksklusibong pakighinabi sa Bombo Radyo Cebu ngadto kang Jennat Alih Cortes, ang Exec. Director sa Office for Muslim Affairs and Cultural Communities (OMACC), siya nagkanayon nga gikahimuot niya ang nagmalampusong selebrasyon sa Eid al-Adha.
Diin, basi sa ilahang gibana-banang gidaghanon nga misalmot anaa sa 5,000 ka mga Muslim ang nipartisipar sa maong kalihokan.
Ingun man nga gitino usab ni Cortes nga sa ilahang tema karon sa selebrasyon sa Eid al-Adha mao ang panaghiusa sa hugpong sa Muslim sa Sugbo.
Gani, basi sa nahimong pag-preach sa ilahang imam, gihatagan niini og importansya ang panaghiusa sa mga Muslim tungod sa mga kasamtangang isyu ug hagit nga nasinati sa nasud.
Gawas sa mga Muslim, adunay nisalmot usab nga foreign student sa maong kalihokan diin sa eksklusibong pakighinabi usab sa Bombo Radyo Cebu kang Abdul Azziz, siya mibutyag nga namatyagan niya ang kalahian sa selebrasyonsa Eid al-Adha sa Pilipinas, kompara sa Saudi Arabia, kung diin siya gagikan.
Gikalipay usab ni Azziz nga bisan anaa siya sa Pilipinas,nabati gihapon niya ang kamatinud-anon nga selebrasyon.
