Makigsangka si EJ Obiena batok sa pipila ka mga labing maayo nga Pole Vaulters sa 2025 Mondo Classic nga ipahigayon sa IFU Arena sa Uppsala, Sweden karong Marso 13.
Ang kompetisyon pangunahan sa elite pole vaulters, nga si world record holder Mondo Duplantis.
Nasayran nga mao na kini ang katapusang indoor event ni Obiena sa wala pa ang iyang preparasyon sa outdoor season, diin mosalmot siya sa tulo ka kompetisyon sama sa Asian Championships sa Gumi, South Korea nga ipahigayon sa Mayo 21 ngadto sa 31, ang World Outdoor Championships sa Tokyo, Japan, gikan sa Setyembre 13 ngadto sa 21, ug ang Southeast Asian Games sa Bangkok, Thailand nga ipahigayon gikan sa Disyembre 7 ngadto sa 19.
Nanghinaot usab si Obiena nga makabaton og laing kahigayonan nga maka-podium sa Mondo Classic, human makadaog og bronze medal sa miaging tuig sa iyang countback nga may marka nga 5.91 metros.
Ang Mondo Classic gikonsiderar usab nga importanteng kalihokan isip pagpangandam sa World Indoor Championships nga ipahigayon sa Nanjing, China karong Marso 21 hangtod 23.
Apan wala makasulod si Obiena sa World Indoor Championships tungod kay wala niya ma-clear ang 5.85-meter qualifying standard atol sa qualifying period kini tungod kay gipili niya nga mopahuway sa iyang injury sa bukobuko nga iyang naangkon samtang nag-training kini alang sa Paris Olympics sa miaging tuig.
