Gikataho nga ang ekonomiya sa Pilipinas mao’y usa sa labing paspas nga pagtubo sa Asya karong 2024 bisan pa sa mga hagit sa kalibutan sama sa geopolitical tensions.
Kini human natala ang paglambo sa ekonomiya sa Pilipinas sa 5.2% sa ikatulo nga kwarter sa tuig, hinungdan nga niigo sa 5.8% ang kasagaran nga pagtubo sa ekonomiya sa unang 3 ka quarter.
Nalabwan sa ekonomiya sa PH ang ubang kanasuran sa Asya lakip na ang Malaysia nga adunay 5.2% nga pagtubo sa ekonomiya sa naasoy nga panahon, Indonesia 5%, bisan ang China nga adunay 4.8% lamang, ug Singapore nga adunay 3.8%.
Ang mga nag-unang kontribusyon sa paspas nga pagtubo sa ekonomiya sa nasud mao ang kusog nga pagporma sa kapital ug paspas nga paggasto sa gobyerno.
Matud pa ni National Economic and Development Authority (Neda) Secretary Arsenio Balisacan, ang ekonomiya sa nasud kay nagpakita og talagsaong kalig-on karong tuiga diin ang gross domestic product (GDP) nga pagtubo nitubo sa average nga 5.8% sa unang 3 ka quarter sa 2024.
Kini bisan pa nga ang nasud kay nakasinati og weather-related disturbances o disruptions sa tibuok tuig ingon man ang taas nga ting-init tungod sa El Niño phenomenon ug sunodsunod nga kusog nga bagyo tunga-tunga sa La Niña.
Bisan pa niini, matod niya, ang growth rate sa nasud nagpabilin gihapon sa posisyon isip usa sa labing paspas nga pagtubo sa ekonomiya sa Asya nga nagpamatuod sa kakugi ug dedikasyon sa katawhan ug sa mga polisiya nga gipatuman sa gobyerno taliwa sa mga hagit.
