Ipabasura sa kampo ni Governor- elect Pam Baricuatro ang “Election protest” nga gisang-at ni outgoing Governor Gwendolyn “Gwen”Garcia sa Commission on Elections (COMELEC) batok kaniya, kay matod pa sa kampo ni Baricuatro, usa kini ka “baseless case” o walay kamatuoran.
Subay kini sa higayon nga nakadawat si Baricuatro og summon gikan sa COMELEC, didto sa iyahang pinuy-anan sa Población, Pinamungahan, Ceb, isip katubagan sa gihimog protesta sa habig ni Garcia.
Sa pagluwat niini nga pamahayag, gipangulohan kini ni Atty Edmund Lao, ang pangu sa transition team ni Baricuatro.
Diin, iyahang gikabutyag nga ang mga abogado ni Baricuatro, andam na sa ilahang mga tubag ug barugan sa bisan unsa nga pangutanang ilabay sa COMELEC ngadto ka niya.
Magsugod gahapong adlawa, Miyerkules, Hunyo 11, ang lima (5) ka adlaw aron muduso og verified answer nga nga gihatag sa COMELEC ngadto ni Baricuatro.
Gidugang niini nga si Baricuatro kay nagporma na sa iyang kaugalingong legal team nga nagtinguha sa pag-dismiss sa gihulagway niining “baseless case” nga maghatag sa transition team niini sa pag-focus sa preparasyon sa umaabot administrasyon sa kapitolyo sa Sugbo.(Bombo Irene Ardiente)
