CEBU – Una nang gikonsiderar sa mga fire investigator nga electrical mishap ang posibling hinungdan sa sunog nga miigo sa usa ka bodega sa Sitio Fatima, Barangay Jubay sa lungsod sa Liloan niadtong Domingo sa hapon, Hunyo 26, 2022.
Kini ang gibutyag ni Liloan Fire Station ground commander nga si Shoji Mendaros,nga posibleng nagsugod ang sunog tungod sa electrical mishap, Hinuon, wa pa siya makatug-an sa mga detalye sa posibleng sirkumstansiya sa pagsilaob niini.
Matod ni Mendaros nga ila na usab nga gitumbok kung asa nga lugar nagsugod ang sunog, apan ipaubos pa kini sa verification.
Gibanabanang mokabat sa P175 milyones nga kantidad sa kabtangan ang naugdaw sa sunog, nga nakaapekto sa labing menos 5,000 square meters nga luna.
Dugang pa ni Mendaros nga una nilang nahibaw-an nga walay mga trabahante niadtong tungora sanglit wala sila’y trabaho sa adlaw’ng Domingo ug ang security guard lang nga nadestino atubangan sa ilang compound ang diha sa nahitabo ang insidente.
Matod ni Mendaros nga hagip-ot ang dalan paingon sa bodega hinungdan nga naglisud sila.
Milungtad og mga 11 ka oras ang sunog nga miigo sa maong bodega una kini gideklarar sa mga bombero nga “fire out” alas 2 sa kaadlawon niadtong Lunes, Hunyo 27, 2022.
Nakadawat sila og tawag mga alas 3:08 sa hapon ug Giisa kini sa ikatulo nga alarma mga alas 3:28 ug ikaupat nga alarma sa hapon 3:57 p.m. matag usa.
Samtang alas 4:12 sa hapon,giisa kini sa Task Force-Bravo ug pasado alas 5 sa hapon, nakontrolar ang sunog.
Niining hitaboa, gipahinumdoman ni Mendaros ang mga tag-iya sa bodega nga susihon kanunay ang ilang precautionary measures, ilabina kadtong mga hazard zone sulod sa ilang mga pabrika,ug gikinahanglang motuman ang mga pabrika sa fire safety requirement sa Bureau of Fire Protection.
