Mi-apelar ang Environmental Management Bureau (EMB) 7 sa katawhan nga mugamit ug alternatibo nga pamaagi inay nga mugamit ug mga fireworks o uban pang mga paboto.
Gibutyag ni Engr. Cindylyn Pepito-Ochea, ang head sa EMB 7 Environmental Education and Information Unit, nga inay paboto, mas maayo nga mugamit ug ‘bubbles’ o mga ‘torotot’ sa pagsaulog Pasko ug Bag-ong Tuig, arun nga dili maapektohan ang kalidad sa hangin.
Matud pa, kaniadtong pandemya diin walay mga sakyanan ug ang tanan nagpuyo lang sa panimalay, giingong nahimong maayo ang kalidad sa hangin ug hilabihan ka ubos ang natala nga kahugaw sa hangin.
Karun nga nabalik na sa normal diin daghan na usab ang mga sakyanan, giingong naapektohan na usab ang kalidad sa hangin apan anaa pa man gihapon kini sa ‘good air quality level’.
Gisiguro niini nga mag-monitor ang ahensya sa kalidad sa hangin karung Christmas ug New Year’s Eve ilabi na kung adunay daghang mugamit ug paboto.
