Pormal nang gitudlo sa Department of Finance (DOF) isip Officer-in-Charge City Treasurer sa Kagamhanang Dakbayan sa Sugbo si Emma C. Villarete atol sa anunsyo ni Vice Mayor Tomas “Tommy” Osmeña niadtong Huwebes sa gabii, Agosto 28, 2025.
Gihimo ni Osmeña ang maong pahibalo pinaagi sa iyang social media account human nakadawat na ang City Hall sa letter gikan sa DOF nga pinirmahan ni Finance Secretary Ralph Recto.
Si Villarete kay kasamtangang naghupot sa posisyon isip Cebu City Government Assistant Department Head II of the Internal Audit Services Office apan girekomendar nga mahimong OIC City Treasurer human si kanhi Treasurer Mary Vae Reyes kay gi-dismiss sa Ombudsman tungod sa kasong giatubang niini nga fraudulent scheme sa garbage deal sa mga nakalabayng administrasyon.
Ang appointment ni Villarete kay muhangtod og usa ka tuig gawas nalang og ma revoke kini sa mas sayong panahon.
Ang pagkatudlo ni Villarete kay gipanglantawang makasulbad sa nabaldang operasyon sa City Treasury Office ilabi na sa mga wala mapagawas nga sweldo sa mga trabahante sa dakbayan.
