CEBU CITY- Gihatagan og katin-awan sa usa ka Mental Health Consultant nga ang love dili kalit nga pagbati kondili usa ka proseso nga hinay-hinay nga na-develop gikan sa neutral nga emosyon padulong sa mas lalom nga attachment.
Kini ang gipasabot ni Stella Ferrarez,RPM, Mental Health Consultant, nga matud pa, ang love giisip sa psychology nga usa ka “extreme positive feeling” nga natural nga parte sa emosyon sa matag tawo.
Nagsugod kini sa neutral nga pagbati o casual nga pagtan-aw sa usa ka tawo, hangtod nga mahimong mild liking o ganahan, nga kasagaran nagdala og kilig ug interes sa pakig-istorya.
Sa mosunod nga lebel, mahimong moderate hangtod strong liking, diin mas mosamot ang excitement ug emosyonal nga koneksyon. Apan dili tanan strong liking nagpasabot dayon og love.
Gidugang niini, nga mahibaw-an nga love na kung adunay emotional attachment, nga malipay ang usa ka tawo dili lamang tungod sa iyang kaugalingong kalipay, kundili tungod usab kay nalipay ang laing persona uban kaniya.
Gidugang pa nga ang tinuod nga gugma kinahanglan mutual o pareho nga pagbati, tungod kay ang one-way nga relasyon mahimong dili healthy ug mahimong hinungdan sa emosyonal nga kasakit.
Sumala pa sa eksperto, ang love dili lamang para sa romantic partners kundili apil usab sa pamilya, higala ug komunidad, nga nakatabang sa pagpalig-on sa mental ug emosyonal nga kahimtang sa usa ka indibidwal.
