Nanggawas sa ilang mga opisina ang mga empleyado sa Cebu City Hall niadtong hapon sa Lunes, Mayo 4, 2026, human nabatyagan ang kusog nga pagtay-og sa yuta nga nitay-og sa nagkalain-laing parte sa Visayas. Gilayon nga gipatuman ang safety protocols sa mga buhatan sa gobyerno niadtong higayuna aron masiguro ang kaluwasan sa tanan samtang gihimo ang orderly evacuation paingon sa mga designated open areas.
Base sa taho gikan sa Philippine Institute of Volcanology and Seismology (PHIVOLCS), ang linog nga nahitabo sa alas 2:09 sa hapon naggikan sa San Julian, Eastern Samar nga adunay kusog nga Magnitude 6.1.
Natala ang Intensity 1 sa Dakbayan sa Sugbo, Liloan, ug Carcar City, hinungdan nga lakip ang Provincial Board daling nisuspinde sa ilang regular session human mismo ang mga opisyal nakabatyag sa paglihok sa yuta samtang nagpadayon ang ilang proceedings.
Gipatuman usab ang preemptive evacuation sa Cebu Provincial Capitol isip dinaliang tubag sa maong kalamidad aron masiguro nga walay madisgrasya sa mga kawani ug sa publiko. Human sa maong hitabo, wala hinuoy natala nga mga samdan o bisan unsang dakong damyos sa mga istruktura sa City Hall base sa gihimong inisyal nga inspeksyon sa mga awtoridad.
Nagpabilin nga on-alert ang Cebu City Disaster Risk Reduction and Management Office (CCDRRMO) alang sa mga posibleng aftershocks ug padayon ang ilang pakig-alayon sa ubang ahensya sa gobyerno.
Gipahinumdoman usab sa mga opisyal sa siyudad ang tanan nga magpabiling kalmado, mabinantayon, ug hugot nga sundon ang earthquake safety protocols sa tanang higayon.
