CEBU CITY-Kakugi ug dedikasyon ang gipakita sa mga empleyado sa probinsiya sa Sugbo hinungdan nga hatagan kini og insentiba hilabi na sa nakalabay nga tuig diin nakasinati ang Sugbo og dagkong mga pagsulay.
Gi-aprobahan kini sa Hunta Probinsyal diin gipangulohan ni Vice Governor Hilario ‘Junjun’ Davide III, ang supplemental budget number 1 sa una, ikaduha ug ikatulong pagbasa, atol na sa ilahang regular session nga gipahigayon kagahapong adlawa, Agosto 7.
Nasayran, nga ang approciation ordinance gi-‘certify as ‘urgent’ sa opisina ni Cebu Provincial Governor Gwendolyn Garcia ug nigahin og 62.9 milyones ka pesos alang sa maong incentives.
Dugang pa niini, nga gahinan usab sa maong insentiba, ang mga appointed officials, regular ug casual employees, ingon man ang mga job order workers.
Gitataw ni Board Member Glenn Anthony Soco, ang chairman sa Committee on Budget and Appropriations sa Hunta Probinsyal, nga ang maong lakang alang sa mga serbisyo sa mga opisyales ug mga empleyado sa Kapitolyo nga nagpakita og maayong trabaho bisan pa man sa daghang mga pagsulay nga gisagubang sa probinsiya.
Samtang, gidugang pa ni Danilo, ang Cebu Provincial Budget Officer, nga ang mga elected ug appointed officials, lakip na ang mga casual ug regular nga mga empleyado ang makadawat og tag-P25,000 matag usa, ingon man nga anaa sa P15,000 ang madawat nga premiums sa mga job order nga empleyado.
