METRO MANILA-Gipahimangnuan ang mga employer nga sundon ang bag-ong minimum wage human aprobahan sa NCR Wage Board ang P35 nga usbaw sa suholan sa mga trabahante sa pribadong sektor sa rehiyon.
Matod sa labing dakong grupo sa negosyo sa nasod, ang Philippine Chamber of Commerce and Industry (PCCI), ilang girespito ang desisyon sa regional wage board ug hugot nilang sundon ang bag-ong inadlaw nga minimum nga suholan nga P645 gikan sa P610.
Giinsister usab sa grupo nga makatarunganon ang bag-ong umento sa suholan kon itandi sa P100 nga proposal nga giingong sobra ra sa mga amo ug mahimong mosangpot sa pagpasira sa mga negosyo ug pagkawagtang sa mga trabaho sa mga mamumuo.
Dugang pa nga importanteng tagdon ang epekto sa pagsaka sa minimum age sa mga negosyo nga mapugos sa pag-adjust sa mas taas nga gasto sa pamuo, partikular na sa micro, small and medium enterprises (MSMEs).
Nagtuo usab ang grupo nga win-win decision kini sa mga amo ug trabahante.
Samtang, ang grupo niingon nga ilang bantayan ug i-evaluate ang epekto niini sa mga gagmay nga negosyo nga ilang gikonsiderar nga backbone sa atong ekonomiya.
