Nakaangkon og mga samad sa kamot ang usa ka traffic enforcer human kini malatayan sa usa ka puti nga SUV niadtong Miyerkules sa buntag, Hulyo 1, 2026, diha sa intersection sa Escario Street ug Osmeña Blvd. atubangan sa Provincial Capitol.
Giila ang biktima nga si Jovanie Verano, kinsa sakop sa Cebu City Transportation Office (CCTO).
Sumala sa footage sa CCTV, naghuot na ang dagan sa trapiko sa maong dapit hinungdan nga gipahunong ni Verano ang mga sakyanan gikan sa dapit sa Banawa-Guadalupe aron dili mosamot ang kahuot sa Escario Street.
Human niya mapahunong ang puti nga SUV, mitalikod si Verano aron palabyon ang mga sakyanan sa Osmeña Blvd. paingon sa Velez Street, apan kalit nga miabante ang maong SUV ug nibangga kaniya.
Daling miligid si Verano aron malikayan ang mas grabe nga kadaot, apan naligsan gihapon sa ligid sa SUV ang iyang wala nga kamot nga miresulta sa pagkaangol sa iyang mga tudlo.
Tungod kay wala mohunong ang drayber, daling nangayo og tabang si Verano sa iyang mga kauban kinsa mi-intercept sa maong sakyanan sa unahan, samtang gigukod ug gibabagan usab kini sa parking attendant nga si Ariel Daan.
Garbo usab nga gipadayag ni CCTO head Raquel Arce ang iyang tinguha nga personal nga makit-an ug pasidunggan si Daan tungod sa iyang kaisog sa pagtabang.
Samtang, nibisita usab si Cebu City Vice Mayor Tommy Osmeña kang Verano sa ospital gahapon aron personal nga susihon ang iyang kahimtang ug mipadangat og tabang pinansyal.
Gikabutyag usab ni Osmeña nga ang siyudad mopasaka og kaso batok sa drayber sa SUV nga nalambigit sa insidente nga nakaangol sa maong traffic enforcer sa CCTO.
Gihatagan usab ni Osmeña si Verano og personal nga regalo ug gihatagan og ganti ang duha ka mga bystanders nga nitabang sa pagdakop sa drayber.
