CENTRAL VISAYAS- Gihatagan og katin-awan sa kadagkuan sa Department of Education(DepED) Central Visayas, ang kabahin sa mga kabalaka sa katawhan mahitungod sa mga bayranan sa umaabot nga pagtapos sa klase.
Sa pakighinabi sa Bombo News Team kang DepED-7 Regional Director, Dr. Salustiano T. Jimenez, dinhi iyang giklaro nga dili pinugsanay nga mo pagawas og kantidad ang mga ginikanan, labihan na og kining mando gikan sa pangpublikong tunghaan.
Sumala pa niya, ang DepED migahin og dugang nga Maintenance and Other Operating Expenses (MOOE) nga maoy mag silbing pundo alang sa mga komon nga panginahanglanon sa nagkadaiyang tunghaan.
Kabahin usab sa mga bayranan, ugaling naay mga bisita atol sa commencement exercises ug graduation, giklaro kini ni Jimenez nga walay katungod ang tunghaan na mangayo sa mga ginikanan sa magtutungha.
Tataw ni Jimenez, ang pribadong tunghaan lamang ang makabuhat niini kay aduna silay ilang kaugalingong palisiya.
Dugang pa niya, wala sila mag-awhag nga kolektahan og kwarta ang mga ginikan.
Apan, mamahimo lamang nga sila mopagawas ug kantidad kung boluntaryo kini ug dili lapas sa ilang kabubot-on. Hilabi na og aduna silay kaugalingong sugyot kabahin sa proyekto ug uban pa.
Sa pikas bahin sa iyang pahayag, karong tuiga usab masugdan pagbalik ang naandan nga school year sa wala pa mahitabo ang pandemya.
Busa, sa ikaduha o ikatulong simana sa Hunyo magsugod pagbalik ang klase alang sa school year 2025-2026. Ug mahuman ang klase rong tuiga sa umaabot nga petsa 14 o 15 sa Abril-2025 sa pag-eskwela.(Bombo Irene Ardiente)
