CEBU CITY-Nagsugod na ang enhanced community quarantine (ECQ) sa dakbayan sa Sugbo kaganinang alas 12 ka udto. Marso 28,2020.
Kini ang kabahin sa mga gipatuman nga lakang aron nga dili na hilabihang makakatap pa ang COVID-19.Gisugdan ang ECQ pinaagi sa bagting sa kampana sa mga simbahan ug busina sa barko.
Si Cebu City Mayor Edgardo Labella mismo ang nangunay sa pag-inspection sa implemenation niini kung diin uba-ubay ka mga sakyanan ang naabtan sa check points ilabina sa may South Road Properties (SRP).
Gipahimangnu-an lang hinoon ang mga naabtan nga sakyanan sa enhanced community quarantine nga sugdan na ang strikto nga pagpasulod ug pagawas sa dakbayan.
Una niini, midagsa usab ang katawhan sa mga grocery store sa kabalaka nga magpatuman og lock down.
‘Warning’
Milakip ang Land Transportation Office (LTO-7) sa pagpatuman sa enhanced community quarantine sa Sugbo karong adlawa. Kung diin kalit nag nakamugna og traffic gumikan sa mga sakyanan nga naatlan sa ECQ nga manguli-ay sa ilang tagsa-tagsa ka probinsya.
Matud ni LTO-7 Regional Director Victor Caindec nga ilang gitugyan sa kapulisan ang paghiling, pag-inspection og pagsita sa mga sakyanan nga musulod ug mugawas sa dakbayan subay sa enhanced quarantine.
Apan giklaro hinoon sa direktor nga tungod kay duna pay 5 ka adlaw nga daw sama nga leeway sa pagpakita sa quarantine pass, ug nag-adjust pa ang mga tao, igo lang usa sila karon sa ‘warning‘. Apan human sa 5 ka adlaw, ipatuman na ang strikto nga enforcement sa mga passes kung diin ang wala nalakip sa mga exemptions, ang dili gyud makasulod sa dakbayan sa Sugbo.
