CEBU CITY-Ni-angkon ang kapulisan nga ang dagkong pagpanlimpyo mahimong walay tumong kung dili ipatuman ang environmental laws.
Niingon ang Cebu City’s Task Force Gubat sa Baha deputy commander nga si retired Colonel Jefferson Omandam nga panahon na nga seryosohon ang paggukod sa mga violators.
Gitataw niini nga walay kapuslanan ang ilahang pagpaningkamot sa pagpanlimpyo sa mga sapa ug uban pa nga agihanan sa tubig kung ang mga violators pasagdan nga walay silot.
Gitumbok sab niini nga atol sa tigom uban sa mga sakop sa Task Force Gubat sa Baha technical working group ang usa ka balay daplin sa Zulueta Creek nga walay kasilyas ug direkta nga molabay sa mga hugaw niini ngadto sa agihanan sa tubig.
Dugang pa nga ang usa ka mall sa dalan sa Colon diin nahimutang ang Estero de Parian alang sa easement violation.
Nipahigayon ang task force og laing hugna sa clean-up drive gahapon, Biyernes, Agosto 25.
Nikatakda usab nga mobuhat og usa ka agresibo nga desilting ug declogging operations, aron palawoman ug palapdan ang agianan sa tubig.
Sa laing bahin, nangandam na ang kagamhanan sa dakbayan sa Sugbo sa ika-9 nga National Clean Up Day karong Septiyembre 16. Nagtigom na ang mga sakop sa Coastline Management Board aron pangandaman ang kalihokan sa tibuok nasod.
Gawas sa Cebu City, gibutyag usab sa Coastline Management Board ang localized cleanup sa Cordova, ug Mandaue City.
