Dili diha dayun masinati sa merkado ang pag-ubos sa presyo sa bugas, bisan pa man nga na aprobahan na sa National Economic and Development Authority (NEDA) ang paglaslas sa taripa sa bugas.
Gipasabot ni NEDA Sec. Arsenio Balisacan nga gikinahanglan lang una nga paaboton ang ipagawas nga executive order ni President Ferdinand Marcos, Jr. kalabot niini, hinungdan nga posibling sa Hulyo o Agosto pa kini mahimong epektibo.
Giingong kung mapagawas na ang maong kamandoan, diha pa lang kini maka-apekto sa desisyon sa mga importer kung pila ka volume sa bugas ang gikinahanglan nga angkaton.
Gibutyag ni Balisacan nga naka-depende sa gihapon sa global market price sa bugas ang mahimong presyo niini sa mga kamerkadohan, apan gumikan kay ipa-ubos ang taripa, makatabang kini nga makunhoran ang taas nga presyo.
Samtang, magpabilin usab ang kanhi taripa sa ubang mga produkto nga pang-agrikultura sama sa mais, asukar, sibuyas, broccoli, cassava, kamote, kape ug mechanical deboned meat.
