Gi-revoke sa Energy Regulatory Commission (ERC) ang permit to operate sa Villar-owned Siquijor Island Power Corporation (SIPCOR) tungod sa grabeng krisis sa kuryente sa Siquijor, matod sa Department of Energy (DOE).
Matod ni Energy Secretary Sharon Garin, epektibo dayon ang maong kamandoan human napakyas ang SIPCOR sa pagsulbad sa problema sa kuryente sulod sa halos duha ka buwan.
Sumala sa pag-audit sa National Electrification Administration (NEA), ang mga residente nakasinati sa kinatibuk-ang 568 nga pagkaputol sa kuryente, o kapin sa 31 ka beses matag bulan, sukad Enero.
Tungod niini, gideklarar sa probinsiya ang state of emergency diin apektado ang mga ospital, eskwelahan, ug panginabuhian ilabi na ang turismo.
Gipulihan sa PROSIELCO (local electric cooperative) ang SIPCOR pinaagi sa temporaryo nga power supply agreement sa TotalPower Inc.
Giklaro ni Garin nga dili politiko ang maong aksyon ug resulta kini sa padayong kapakyas sa SIPCOR sa pagtuman sa ilang katungdanan.
Sa laing bahin, gikompirmar sa SIPCOR ang pagkadawat sa maong order ug niingon nga ila kining tun-an aron mapasakaan og legal nga tubag.
