CEBU CITY- Gideklarar nga dead on arrival sa tambalanan ang 19-anyos nga tinun-an sa turismo sa University of San Carlos human ang gisakyang motorcycle-for-hire nidasmag sa garbage truck sa Barangay Lorega San Miguel, dakbayan sa Sugbo.
Giila ang biktima nga si Geraldine Amad Asentitas, residente sa Barangay Labangon.
Wa maunsa si Joselito Añasco Cenabre, ang motorcycle-for-hire driver nga nagpuyo sa Barangay Pajo, dakbayan sa Lapu-Lapu.
Matud sa kapulisan sa Parian Police Station nga ilang gitanggong si Michael Rivera, ang drayber sa garbage truck.
Dugang pa, nga si Rivera nitug-an sa kapulisan nga nitabok siya sa Imus Avenue ug liko sa wala paingon sa Barangay Carreta dihang iyang gitumban ang brake human kalit nga nihunong ang sakyanan sa iyang atubangan.
Matod niya nga wa niya makita ang motorcycle-for-hire sa iyang wala.
Base sa imbestigasyon sa kapulisan, nalagpot si Asentitas ug nakahiagom og grabeng samad nga maoy hinungdan sa iyang kamatayon.
Pasakaan si Rivera og kasong reckless imprudence resulting to homicide.
