Gisugyot karon sa gobyerno nga mogamit nalang og euro 2 nga matang sa fuel, gumikan sa krisis nga nasinati sa kadaghanan nunot sa nagpadayong tensyon sa Middle East.
Subay niini, eksklusibong gikuha sa Bombo Radyo Cebu ang habig sa Sanlakas Cebu, pamaagi ni sa panglantaw ni Teody Navea ang Secretary General sa ngalan sa Sanlakas Cebu.
Matod ni Navea, mura-ura og nagsugal ang gobyerno kabahin sa nahuna-hunaang pamaagi aron masolusyonan ang krisis nga giatubang ug gisagubang karon sa kadaghanan, subay sa nagpadayong tensyon sa Middle East.
Hinungdan, alang kaniya, dili kini husto nga pamaagi, tungod kay walay bisan kinsa ang makatag-an kung ang gubat magpabilin ba lang nga temporaryo.
Ingun man nga kung molungtad ang paggamit sa euro 2 fuel, maghatag kini og perwesyo sa katawhan.
Sa pikas bahin, susama ra gihapon ang baruganan ni Navea nga dili usab husto ang lakang karon ni Presidente Ferdinand Marcos Jr. nga mo-import kini og coal.
Matod pa sa Presidente, ang maong pag-import nagsiguro nga lig-on nga suplay sa enerhiya sa nasud samtang ang gubat sa Middle East nagpadayon sa paghulga sa global nga stock sa petrolyo.
