CEBU CITY-Mukabat sa kapin tunga sa milyon pesos ang shabu nga nasakmit gikan sa usa ka ex-convict atol sa buybust operation sa may Brgy. Kinasang-an niining dakbayan.
Naila ang dinakpan nga si Jeneson Sabanal. 40 anyos ug residente sa maong dapit.
Matud ni PMajor Regino Maramag ang hepe sa Pardo Police Station (PS) nga kanhi na priso na ang subject sa susamang kalapasan apan mibalik na usab sa iligal nga kalihokan.
Mukabat sa 647,000 pesos ang kinatibuk-ang kantidad sa shabu nga nakuha gikan niini.
Samtang, laing bago pa usab nga nakagawas sa prisohan ang napatay atol sa buybust operation nga miresulta sa shoot out sa may Sitio Magay. Brgy Tangke, Talisay City, Cebu.
Naila ang napatay nga si Ramil Amagos, 30 anyos ug residente sa maong dapit.
Matud ni Police Lieutenant Colonel Marlu Conag ang hepe sa Talisay PNP nga mibalik na usab sa pagpamaligya ang kanhi dinakpan hinungdan nga nagpahigayon sila og operasyon.
Apan padulong palang matud pa sila sa panimalay sa subject mipauwan na kini og bala ngadto kanila hinungdan nga mibalos ang kapulisan og pabuto.
Milanat og 10 minutos ang pinusilay nga misangpot sa kamatayon sa subject. Wala hinooy nasamdan sa mga operatiba.
Nakuha gikan sa subject ang usa ka cadaver, .38 caliber revolver nga dunay 4 ka buhing bala, ug usa ka pakete sa gidudahang shabu nga duany kantidad nga 17,000 pesos.
