CEBU – Gibisitahan ni kanhi-House Speaker Gloria Macapagal Arroyo ang lungsod sa Argao, Cebu aron subayon ang kalambuan sa mga proyektong natukod sa dihang nahimo pa kining presidente kaniadto.
Pipila sa iyang mga na-revisit mao ang Candabong Drug Rehabilitation Center, tunghaan sa high school ug unibersidad, ug ang Argao-Loon, Bohol RORO port.
Gikalipay ni Arroyo ang kalambuan sa nahimong mga proyekto sa segundo distrito ilabi na ang roll-on-roll-off port diin dako kini og tabang alang sa turismo ug ekonomiya.
Dugang pa ni Arroyo nga ang iyang pagbalik sa Argao maoy kabahin sa iyang gisuwat nga memoirs.
Matud sa kanhi House Speaker nga gustong bisitahon sa iyang mga apo ang mga nag-unang destinasyon sa Sugbo sama lang sa Alegria ug Oslob.
Human sa iyang pagbisita sa mga pasilidad sa Argao, milahos kini sa usa ka hotel sa maong lungsod diin siya ang nahimong pinasidunggang dinapt sa usa ka event ug nagpanumpa kini ni elected 2nd District Rep. Willie Caminero.
Human sa iyang pagka-lider sa Kamara, gi-atuman usab ni Arroyo ang pagka-provincial government consultant sa Pampanga.
