Gitugotan sa Senate impeachment court ang pagpresentar kang kanhi Sandiganbayan Presiding Justice Amparo Cabotaje-Tang isip usa ka expert witness sa nagpadayon nga impeachment trial batok kay Vice President Sara Duterte, bisan pa man sa lig-on nga pagsupak gikan sa kampo sa depensa.
Si Justice Tang ang maoy unang saksi nga gi-imbitar sa House prosecution team alang sa paghisgot sa Article II sa Articles of Impeachment, nga naglambigit sa giingong dili mapasabot nga bahandi o unexplained wealth, sayop nga pagdeklarar sa Statement of Assets, Liabilities, and Net Worth (SALN), ug pipila ka mga interes sa negosyo sa Bise Presidente.
Gikuwestiyon sa abogado sa depensa nga si Atty. Mark Vinluan ang pagpatim-aw sa kanhi opisyal.
Sumala ni Vinluan, ang testimonya ni Tang maghatag lamang og mga legal nga konklusyon—usa ka tahas nga gipanag-iya lamang sa mga senator-judges ug dili sa usa ka saksi.
Apan gipasabot ni House Prosecutor ug Akbayan Party-list Representative Chel Diokno nga ang kahanas ni Tang sa mga balaod sa public accountability makatabang pag-ayo sa korte.
Gipahayag ni Diokno nga ang pag-evaluate sa mga komplikadong kaso sa anti-graft ug pinansyal nga rekord nanginahanglan og kasaysayan ug kahanas nga gikan mismo sa usa ka retiradong punoang maghuhukom sa Sandiganbayan.
Aron matubag ang mga kabalaka sa magkaibag nga bahin, nagpagawas og desisyon si Presiding Officer Chiz Escudero nga nagtugot sa pagpresentar sa saksi.
Gipasiugda ni Escudero nga ang matag habig adunay katungod sa pagpresentar og mga saksi aron mapadayon ang patas nga proseso sa hustisya.
