Cebu City-Patay ang kanhi Brgy. Kapitan sa Brgy Lagtang dakbayan sa Talisay human kini gipusil sa wa mailhing mamumuno sa giabangan niini nga balay sa sityo Dumlog, Brgy Simala lungsod sa Sibongga.
Ang biktima mao si Mark Ferdinand Bas kinsang nalakip usab sa narcolist ni Presidente Rodrigo Duterte . Matud ni Police Chief Inspector Stephen Amamaig nga nakadawat sila og alarma pasado ala una ganikhang sayo sa kaadlawon apan sa dihang mirespondi ang kapulisan sa lugar, mingaw man ug wala man matud pay nakakumpirmar kanila kung naa bay buto sa armas nga nadunggan hinungdan nga ningbalik nalang ang mga kapulisan.
Apan pag ka alas-sais sa buntag dunay mireport gayuid sa ilahang buhatan ug mipahibalo nga gipusil patay ang kanhi kapitan sulod sa balay nga giabangan niini.
Nasayran nga dugay na nga wala igkita si Bas sa Brgy Lagtang human kini miresign sa iyahang pwesto gumikan sa pagkalambigit sa iligal nga drogfas. Bisan niadtong gipatay ang iyahang anak nga si Lagtang konsehal Art Stephen Bas, wala usab kini mipatim-aw sa iyahang pamilya.
3 usab ka posibleng anggulo ang gitan-aw karon sa kapulisan sa Sibonga Police Station. Matod pa sa imbestigador sa Sibonga Police Station nga si PO3 Eduardo Semilla nga personal grudge, drug-related, ug pulitika ang gisubay nga mga anggulo sa pagpatay sa kanhi kapitan sa Brgy. Lagtang, Talisay City nga si Mark Fernandez Bas.
Nasayran ni Semilla gikan sa mga lumulupyo nga walay kalibutan ang mga silingan sa maong insidente sanglit layo man ang distansya sa kabalayan niini. Palawman pa usab sa Sibonga Police Station ang imbestigasyon sa pagpamusil patay aron masuta kung unsa ang klaro nga motibo niini.
Samtang waka pay nakit-an nga person of interest ang Cebu Provincial Police Office sa maong pagpamusil ug nagkanayon si CPPO director S/Supt. Manuel Abrugena nga walay mihatag og dugang pa nga kasayuran ang mga lumulupyo sa Sitio Dumlog, Brgy. Simala, Sibonga, Cebu human sila nakig-alayon sa ilang barangay captain
Tan-awon pa sa CPPO ang posibleng teyorya nga may labot na sa nahitabong krimen.
Gikumpirmar usab ni Abrugena nga naapil sa drug watchlist ni Pres. Rodrigo Duterte si Bas.
