Mitestigo isip unang saksi sa House Prosecution panel si Violeta Constantino, kanhi branch manager sa Land Bank of the Philippines (LBP) Shaw Boulevard branch, kalabot sa mga kaso sa misuse of confidential funds charges batok kang Vice President Sara Duterte samtang nagpadayon ang impeachment trial karung adlawa Miyerkules, Hulyo 29.
Mitestigo siya alang sa Article I sa impeachment complaint, bahin sa giingong pag-abuso sa ₱612.5 milyon nga confidential funds sa Office of the Vice President (OVP) ug sa Department of Education (DepEd).
Gikumpirma ni Constantino nga siya mismo ang nagdumala sa pag-encashment sa upat ka tseke.
Ang matag tseke nagkantidad og ₱125 milyon o kinatibuk-ang ₱500 milyon.
Kini nga mga tseke gihatag ug giingong nadawat ni Gina Acosta, ang special disbursing officer sa OVP.
Ang mga pag-withdraw giingong nahitabo tali sa Disyembre 2022 ug Septyembre 2023.
Prangka nga gisultihan ni Constantino ang korte sa impeachment sa Senado nga giisip nga “talagsaon” o “unusual” alang sa OVP ang pag-withdraw sa ingon ka dako nga kantidad sa kwarta o P125 milyon matag transaksyon.
Ang direktang pag-eksamin kang Constantino gipangulohan sa piskal sa House ug Representative sa Manila nga si Joel Chua.
Human sa iyang testimonya, ang abogado ni VP Sara Duterte, si Atty. Michael Poa, mipahibalo nga dili na nila i-cross-examine si Constantino.
Ang pagpakita ni Constantino isip saksi kabahin sa ika-10 nga adlaw sa impeachment trial sa Bise Presidente.
