CEBU CITY — Kasong malicious mischief ang atubangon ni kanhi Cebu City Mayor Tomas Osmeña human nga gipaguba niini ang opisina sa mayor sa City hall sa iyang paghawa.
Kini ang gipasabot ni Atty. Rey Gealon, ang city legal officer, diin aduna gyuy tulubagon si Osmeña human mi-angkon nga siya ang nagpaguba sa opisina og nanguha sa iyang mga personal nga gamit sa iyang pagbiya sa pwesto.
Matud niini nga “immovable” sa tanang gamit sa opisina sa gobyerno sama sa tiles, wiring, kisame og uban pang mahulog nga government property ug walay bisan kinsa ang mamahimong muguba niini tungod kay gipanag-iya kini sa mga katawhan.
Una nga gitino ni Osmeña nga gikan sa iyang bulsa ang pag-renovate sa mayor’s office sa dihang milingkod kini niadtong 2016 gumikan kay wala kini tugta sa City Council nga gahinan og pondo alang niini.
Dugang pa niini nga bisan paman og guba ang kahimtang sa mayor’s office, walay choice si Mayor Edgardo Labella kundi adto gyud gihapon mag-opisina sanglit si Vice Mayor Mike Rama naman usab ang mupuli sa iyang opisina isip kanhi bise mayor.
Kahinumduman nga gimanduan ni Osmeña ang sakop sa usa ka construction firm nga tangtangon ang tiles, furnitures, ug uban pang mga gamit nga nagkantidad og halos P2-million.
Temporaryo unang mosulod si Labella sa Senior Citizen Affairs Office samtang nangita pa og paagi ang City Government alang sa pagpa-renovate sa mayor’s office.
Samtang wala makasabot si Vice Mayor Michael Rama sa pagpaguba sa opisina sa mayor sa City Hall atol sa paghawa ni kanhi-Mayor Osmeña.
Gitataw sa kanhi-kaatbang ni Osmeña nga wala sa iyang utok ang pagpangguba ug pagpahawa sa semento ug tiles sa mayor’s office sa dihang nagdumala kini sa dakbayan kaniadto.
