Andam ang kanhi hepe sa Philippine National Police (PNP) nga si Police Gen. Nicolas Torre III nga mangulo sa pag-aresto kang Sen. Ronald “Bato” dela Rosa kon adunay pormal nga mando nga ipagawas.
Sa usa ka eksklusibong interbyu, si Torre miingon nga ang iyang tibuok karera sa pagka-pulis kay gibase sa pagsunod sa direktiba.
Ang posibleng pag-aresto nahimong isyu human gibutyag ni Ombudsman Jesus Crispin “Boying” Remulla nga kuno aduna siyay kopya sa ICC arrest warrant batok kang dela Rosa kalabot sa pekeng war on drugs atol sa administrasyong Duterte.
Si Torre, kinsa unang nailhan sa pag-aresto kang Apollo Quiboloy ug kanhi Presidente Rodrigo Duterte, nga anaa karon sa PNP Personnel Holding and Accounting Unit samtang naghulat sa reassignment.
Iyang giinsistir nga ang iyang propesyonalismo magpadayon bisan wala na siya sa pwesto.
Giangkon usab ni Torre nga si dela Rosa ang iyang “boss ug mentor” kaniadto ug nga daghan silag interaksyon, apan “nausab na ang panahon.”
Hangtod karon, wala pa magpakita sa publiko si dela Rosa sukad sa pagbalita nga aduna na kuno siyay arrest warrant.
Sumala sa iyang kampo, wala siya magtago-tago ug nagtigom lang siya og impormasyon bahin sa giingong ICC warrant.
