Samtang nagkaduol na ang iyang pagretiro sa Marso 2027, si kanhi Philippine National Police (PNP) chief Gen. Nicolas Torre III padayon pa nga naghuna-huna sa iyang sunod nga lakang human mi-resign isip PNP Chief niadtong Agosto 26.
Sa pagkakaron, naka-leave pa si Torre hangtod sa hinapos sa Oktubre ug wala pa makadesisyon kon unsay sunod niyang buhaton.
Matod niya nga nagtutok usab siya sa personal nga adbokasiya batok sa bullying. Nakatakda siyang molusad og anti-bullying fun run karong Nobiyembre 16 sa Santa Rosa, Laguna nga nadasig sa mga insidente nga iyang nasaksihan ug nasinati mismo.
Dugang pa, gikatakda usab nga motestigo si Torre sa kaso batok sa lider sa Kingdom of Jesus Christ (KOJC) nga si Pastor Apollo Quiboloy sa Pasig City karong Oktubre 23. Hinuon, adunay posibilidad usab nga moatras kini tungod sa panagsumpaki sa iyang schedule.
Bisan sa mga espekulasyon, giklaro ni Torre nga wala pa pormal nga gitanyagan siya sa Malacañang og bag-ong posisyon apan nipadayag sa iyang hingpit nga suporta sa administrasyong Marcos Jr.
