Giangkon ni Bise Presidente Sara Duterte nga gitanyagan siya sa iyang amahan nga si kanhi Presidente Rodrigo Duterte nga mobayad sa gasto sa pagkuha sa mga abogado nga nagdumala sa mga kaso sa impeachment nga gipasaka batok kaniya.
Gani, gipaambit sa bise presidente nga daghang higayon na kini nga nakigkita sa mga abogado sa depensa sukad pa sa miaging tuig isip pagpangandam sa impeachment proceedings.
Gipasabot niya nga nag-organisar sila og grupo sa mga abogado sa matag kaso aron maseguro ang tukmang representasyon.
Apan, iyang giingnan ang iyang amahan nga dili na magpadala og kuwarta, kay andam na sila sa mga impeachment.
Gihatagan og gibug-aton sa batan-ong Duterte nga nagsugod sila sa pagpangandam alang sa ligal nga away sa miaging tuig human gisugyot ni ACT Teachers Party-list Representative France Castro ang posibilidad nga ma-impeach siya.
Samtang, gilauman na usab ni VP Sara Duterte nga ang worst case scenario nga mahimong mahitabo kaniya mao nga mapalagpot kini sa katungdanan ug mapasakaan og daghang kaso.
Mao usab kini ang rason nganong wala siya motunga sa NBI kay tataw nga dili makiangayon ang imbestigasyon.
