CEBU CITY — Misugyot si kanhi senador Antonio Trillanes IV nga angayang kasuhan si kanhi Bureau of Corrections chief Nicanor Faeldon.
Kini subay na sa pagkataktak niini sa katungdanan tungod sa isyu sa pagpabuhi sa dul-an 2,000 ka mga piniriso nga nakabenepisyo sa good conduct time allowance (GCTA) law.
Matud ni Trillanes nga angayang sayron sa gipahigayong Senate inquiry kung aduna bay “blessing” gikan sa Malacañang ug sa Department of Justice ang pagpagawas sa libuan ka mga piniriso kinsang nalambigit sa heinous crimes.
Sigon usab sa kanhi senador nga halos kontrolado ang mga tubag ni Faeldon atol sa nanglabay nga mga Senate inquiry gumikan sa kahadlok niini nga masakpan mahitungod sa kwestyonableng pagpagawas sa mga piniriso ubos sa GCTA law.
Dugang pa ni Trillanes nga angayang sayron sa mga mipahigayon og inquiry kung unsa man ang “root cause” sa maong isyu aron usab matumbok kung kinsa ang sad-an niini.
‘WEIRD’ SI FAELDON?
Namatikdan sa myembro grupong Magdalo nga si Sen. Trillanes ang giingong “weird” nga panghunahuna ug lakang ni kanhi BuCor chief Faeldon.
Nasayran nga kauban usab ang kanhi-sundawo nga si Faeldon sa 2003 Oakwood mutiny apan ila kining gitangtang sa grupo tungod sa mga linahi nga linihokan.
Matud ni Trillanes nga natangtang si Faeldon niadtong 2006 sa Magdalo tungod sa mga kalapasan sama lang sa pag-ikyas niini sa dihang under custody kini sa Oakwood mutiny.
Dugang pa sa senador nga gitamnan sa kanhi BuCor chief og bomba ang palibot sa Oakwood hotel kaniadto bisan pa man sa ilang panawagan sa katawhan.
Gihimug-atan sa kanhi senador nga maguba ang tinguha sa grupo kung magpabilin ang giingong pagka-badlungon ni Faeldon.
Hinungdan nga nakita ni Trillanes ang mga kapakyasan ni Faeldon gikan sa pagka-commissioner sa Bureau of Customs, ilabi na sa pagpalusot sa 60-billion pesos nga shabu shipment, hangtud na sa gi-atubang niya nga isyu sa Bureau of Corrections. (GN)
