Gisentensiyahan sa korte sa South Korea ang kanhi Presidente niini nga si Yoon Suk Yeol og lima ka tuig nga pagkabilanggo niadtong Biyernes, Enero 16, human nasuta nga sad-an kini sa obstruction of justice ug uban pang mga krimen nga may kalabotan sa iyang kontrobersyal nga deklarasyon sa martial law.
Sa desisyon nga gipakanaog ni Judge Baek Dae-hyun sa Seoul Central District Court, nakitang sad-an si Yoon sa pagbabag sa mga imbestigador sa pag-aresto kaniya, ingon man sa wala pag-uban sa pipila ka mga miyembro sa gabinete sa usa ka miting nga may kalabotan sa pagplano sa martial law.
Bisan pa, si Yoon giabswelto sa kaso sa pagpeke sa mga dokumento tungod sa kakulang sa ebidensya. Diin ang kanhi presidente gihatagan usab og pito (7) ka adlaw aron mag-apelar.
Sa sinugdanan, ang mga piskal nangayo og 10 ka tuig nga sentensya sa pagkabilanggo alang kang Yoon ug ang silot nga kamatayon tungod sa giingong pagpanguna sa usa ka insureksyon tungod sa pagpahamtang sa martial law.
Sumala kanila, si Yoon angayan sa pinakagrabe nga silot tungod kay wala siya magpakita og pagbasol sa mga krimen nga naghulga sa pagguba sa nasud.
Sumala sa pipila ka mga taho, si Yoon klaro nga nagpahiyom sa korte samtang gibasa ang hangyo sa mga piskal alang sa silot nga kamatayon.
Apan, ang kampo ni Yoon nagpabilin sa ilang lig-on nga baruganan nga ang iyang pagdeklarar og Martial Law usa lamang ka paggamit sa gahum sa presidente sa emerhensya.
