Gikompirmar ni Republican ug kanhi US Vice President Dick Cheney nga iyang botoran si Democratic presidential candidate VP Kamala Harris sa eleksyon sa Nobyembre karong tuiga.
Nunot kini sa pag-endorso sa iyang anak nga babaye ug kanhi Republican Representative for Wyoming, nga si Liz Cheney karong semanaha.
Mahinumdoman nga si Cheney nagsilbi isip ika-46 nga Ikaduhang Presidente sa America ubos sa kanhi Republican President George W. Bush gikan sa 2001 hangtod 2009.
Sa usa ka pamahayag, ang kanhi Bise Presidente, kinsa giisip usab nga usa ka impluwensyal nga personalidad sa panahon sa kataas sa pamunoan ni Presidente Bush, miingon nga walay indibidwal nga hingpit nga hulga sa republika sa America gawas kang Donald Trump, nga mao karon ang pambato sa Republican Partido sa eleksyon sa pagkapresidente.
Gihisgutan usab niini ang pagsulay ni Trump sa pag-hijack sa miaging eleksyon pinaagi sa paggamit sa mga bakak ug kapintasan aron magpabilin sa gahum pagkahuman gisalikway siya sa mga botante. Mao nga dili na siya masaligan pag-usab sa gahom.
Isip usa ka lungsuranon, siya usab miingon nga ang tanan adunay katungdanan nga unahon ang nasud kaysa partisanship aron depensahan ang konstitusyon, kini ang hinungdan ngano nga iyang botaran si Harris.
Ang pamahayag ni kanhi VP Cheney gihangop sa kampo ni VP Harris.
Samtang, gisaway ni Trump si Cheney tungod sa iyang pamahayag ug gitawag ang kanhi Bise Presidente sa US nga walay kalabotan nga RINO nga nagpasabut nga “Republican in name only”.
Gihulagway usab ni Trump si Cheney isip “King of Endless, Nonsensical Wars” tungod sa iyang giingong papel sa gubat sa Iraq.
Gawas kang Cheney, ubay-ubay usab nga mga Republikano ang nipadayag og suporta sa kandidatura ni VP Harris lakip na ang dinosenang mga kanhi opisyal ubos ni kanhi Pres. George Herbert Walker Bush ug Pres. George W. Bush.
