Giklaro sa Department of Health (DOH) nga ang pagsul-ob og facemask dili epektibong panalipod batok sa monkeypox (MPOX), hinuon, matud pa, paglikay sa paghalok ug paggakos ni bisan kinsa usa sa mga paagi aron malikayan ang sakit.
Matud pa sa tigpamaba sa DOH nga si Dr Albert Domingo, dili airborne ang MPOX busa dili ang face mask ang nag-unang proteksiyon niini, dugang pa sa tigpamaba sa kalihim nga, mahimong magsul-ob og face mask ang usa ka tawo apan kung maghalok ug maggakos, mataptan ra gihapon sa nahisgutang sakit.
Nasayran nga ang MPOX mapasa pinaagi sa physical contact, sama sa skin-to-skin contact, paghalok, o paggakos bisag walay sex.
Bisan og nagkataas ang kaso sa MPOX, ang DOH niingon nga mas ubos kini kon itandi niadtong 2024 diin ang tanang kaso sa nasud gi-categorize sa Clade II, nga mas mild ug dili kaayo makatakod kong itandi sa Clade 1b nga mas makatakod.
Gipanghimakak usab sa DOH ang sayop nga impormasyon bahin sa pagpahamtang sa lockdown sa pipila ka mga dapit sa nasud tungod sa MPOX.
