Mipakita ang usa ka fan sa Marvel Comics gikan sa Britain og pasidungog sa iyang paboritong mga bayani ug kontrabida pinaagi sa pagpatattoo og 63 ka karakter sa iyang lawas.
Si Tom Radford, 40 anyos, nakakuha sa Guinness World Records alang sa pinakadaghan nga Marvel Comics characters nga gipatattoo sa lawas.
Nalabwan niini ang rekord nga kaniadto gihuptan nila Ryan Logsdon ug Rick Scolamiero, nga matag usa adunay 34 ka Marvel tattoos.
Si Radford, nga nagpatattoo sulod sa daghang tuig, nakuha ang iyang unang Marvel tattoo niadtong 2016, diin iyang gipatattoo ang kontrabida nga si Thanos sa iyang tiil.
Dinhe nagsugod ang iyang kagustuhan nga magpadugang pa og tattoo.
Plano unta niini nga pun-on ang usa ka tiil sa mga kontrabida sa Marvel ug ang pikas sa mga bayani, apan dali siyang nawad-an og espasyo ug mikatap ang mga tattoo padulong sa iyang likod ug uban pang bahin sa lawas.
Sumala ni Radford, nahibalo siya sa Guinness World Records title ug gituyo niyang mabungkag kini sa wala pa siya moabot sa edad nga 40-anyos.
Gipasabot usab ni Radford nga ang iyang Thanos tattoo karon adunay pirma gikan kang Josh Brolin, nga nagdala sa papel sa kontrabida sa Marvel Cinematic Universe.
Nakabuhat usab siya niini uban kang Elizabeth Olsen, ug naglaum pa siyang makadugang og daghang pirma human sa iyang pag-apil sa San Diego Comic-Con karong tuiga.
