Gipahibalo sa United States Federal Bureau of Investigation (FBI) nga mohatag kini og ganti nga $25,000 o anaa sa P1.4 milyon alang sa impormasyon nga mosangpot sa pagkasikop sa Pilipinong pugante nga si Austin Jan Sy Yatco, kinsa giingong nag-atubang og mga kaso sa child exploitation.
Usa ka federal arrest warrant ang gi-isyu batok kang Yatco niadtong Enero 23 ning tuiga sa United States District Court para sa Eastern District sa New York.
Sa usa ka pahayag, ang FBI Dallas Filed Office nag-ingon nga si Yatco nalambigit sa online exploitation sa mga menor de edad tali sa 2019 ug 2021 isip kabahin sa usa ka network nga naglihok sa mga gaming ug online platform.
Lakip sa mga kaso nga iyang giatubang mao ang pagkunsabo sa paghimo, pagdawat ug pag-apod-apod sa child sexual abuse material.
Si Yatco giingong konektado sa usa ka online group nga nailhan nga “Greegy’s Cult,” kansang mga miyembro giakusahan sa pag-target sa mga mahuyang nga menor de edad ug pagpugos kanila sa paghimo og malaw-ay nga materyal nga sa ulahi gipaambit sa grupo.
Sumala sa FBI, si Yatco kaniadto nagpuyo sa Plano, Texas ug karon gituohan nga mi-ikyas gikan sa Estados Unidos ug posible nga nagtago sa Pilipinas.
Samtang, gipasalig sa FBI nga ilang dakpon si Yatco ug dad-on siya sa ilaha aron ang mga menor de edad nga biktima mahatagan og hustisya.
