Tungod sa daghang kalapasan sa Environmental Laws, nisangpot kini sa pagsuspenso sa Environmental Compliance Certificate (ECC) sa Fifth Avenue Property Development Corporation nga hukom gikan sa Department of Environment and Natural Resources (DENR).
Sa gipagawas nga pamahayag kagahapong adlawa, Lunes, ang DENR nagkanayon nga ang nag-isyu sa suspension mao ang ilang Environmental Management Bureau (EMB) kini human nakitaan sa monitoring nga ang building nilapas sa gitugot nga height limit ubos sa Bantayan Island protected landscape.
Subay sa maong hisgutanan, human sa kamandoan sa pagsuspenso, gisundan usab kini sa kamandoan ni Cebu Governor Pamela Baricuatro ngadto kang Santa Fe Mayor Ithamar Espinosa nga ipatuman ang lagda nga gipagawas sa DENR nga hunungon na ang construction sa high-rise luxury resort sa Santa Fe, Isla sa Bantayan ubos sa mga namatikdang kalapasan niini.
Samtang sa Mayo usab, ang Cebu City Environment and Natural Resources Office (CCENRO), niluwat og mando sa Fifth Avenue Property Development Corp., ang Cebu City-based developer sa The Stria, nga hunungon na ang construction, apan napakyas kini human sa tulo kahigayon sa pagtuman sa Notice of Violations nga gi-isyu sa DENR niadtong Hulyo 31, Septiyembre 17 ug Disyembre 18 sa 2024.
Ang proyekto, nga nakakuha og pagtugot gikan sa Protected Area Management Board (PAMB), gitugotan lang hangtod sa 10 metros o halos tulo ka andana ubos sa Department Administrative Order 2009-09.
Subay niini, ang buhatan sa The Stria lakip ang lokal nga kagamhanan sa Santa Fe, wala pa moluwat og pamahayag kabahin sa nilsuot nga mando.
