Luwas ug nagmalampusong nabuwag ang Filipino conjoined twins, diin gipahigayon ang maong operasyon sa unom ka mga hugna nga gilangkoban sa 22 ka mga eksperto nga medical staff didto sa King Abdullah Specialist Children’s Hospital (KASCH) niadtong Hunyo 18.
Ang maong kaluha nga silang Olivia ug Gianna Manuel, kinsa natawo niadtong Abril 8, 2024 sa Talavera, Nueva Ecija, nakasinati og talagsaong kondisyon diin sila sumpay gikan sa ilang chest padulong sa abdomen. Matod pa sa Saudi Arabian embassysa Manila, anaa na sa “stable condition” ang kaluha ug padayon kining gi-monitor sa Pediatric Intensive Care Unit sa maong tambalanan.
Gisaysay usab sa embahada nga ang tanang galastohan sa operasyon ug pag-atiman sa kaluha giabag sa hingpit sa gobyerno sa Saudi Arabia ubos sa mando ni King Salman bin Abdulaziz ug Crown Prince Mohammed bin Salman.
Mapasalamaton kaayo ang inahan sa kaluha nga si Ginalyn Manuel tungod kay kini na ang adlaw nga ilang gihulat aron makabaton og normal nga kinabuhi ang iyang mga anak isip duha ka managlahing indibidwal. Sila Olivia ug Gianna mao ang ikatulong parisan sa kaluhang Pilipino nga malampusong nabulag ubos sa Saudi Conjoined Twins Programme (SCTP), human usab sa malampusong operasyon sa kaluha nga silang Klea Ann ug Maurice Ann Misa niadtong niaging Abril 24.
