CEBU – Moabot sa 12,000 ka indibidwal ang gipaabot nga modagsa sa Cebu City Sports Center karong Domingo, Agosto 28, alang sa Pasigarbo sa Cebu, nga kabahin sa pagsaulog sa ika-453 nga Founding Anniversary sa Cebu Provincial Government.
Gikatahong 50 ka contingents gikan sa tibuok probinsya ang magtigi alang sa nagkadaiyang mga pasidungog sa “festival of festivals” karong tuiga.
Sa pagkakaron, tagsa-tagsa na nga nagpahigayon og praktis ug blocking ang mga contingent sa venue.
Gawas niini, gipahibawo ni Police Lieutenant Colonel Maria Theresa Macatangay, ang tigpamaba sa Cebu City Police Office (CCPO), nga nakadawat og impormasyon ang ilang buhatan kabahin sa posibleng pagtambong nila ni First Lady Liza Araneta Marcos ug Bise Presidente Sara Duterte sa nahisgutang kalihukan.
Gawas niini, giklaro ni Macatangay nga wala pa silay nadawat nga kompirmasyon kon motambong ba si Presidente Ferdinand Marcos Jr., apan giingong gipangandaman na kini sa kapolisan./
Una nang gipahibawo nga ipatuman ang signal jamming sa adlaw sa kalihokan isip kabahin sa seguridad, apan gipaniguro sa publiko nga dili maapektuhan ang ubang lugar sa dakbayan ug probinsiya.
Mokabat usab sa 1,300 ka polis gikan sa CCPO ang ipakatap aron mamintinar ang kalinaw ug kahapsay sa nasangpit nga aktibidad.
