Gisugyot ni Senador Francis Pangilinan niadtong Martes ang pagbalhin sa flood-control program sa Metro Manila sa ilawom sa pagdumala sa Metropolitan Manila Development Authority (MMDA) ug ang pag-organisa sa mga paningkamot sa pagpakgang sa baha sa ubang bahin sa nasod pinaagi sa mga pangunang river basin.
Matod ni Pangilinan, gikinahanglan sa nasud ang nasudnong flood-control policy nga nakaangkla sa integrated master plan ug klarong lead authority sa matag metropolitan area o river basin aron malikayan ang tipik nga mga proyekto nga mag-usik-usik lang sa pundo sa gobyerno ug ibalhin na lang ang tubig-baha ngadto sa mga silingang komunidad.
Sa ilawom sa iyang sugyot, ang MMDA ang manguna sa pagplano, pag-coordinate, ug pag-monitor sa tanang paningkamot sa Metro Manila, diin ang mga proyekto sa Department of Public Works and Highways (DPWH), lokal nga kagamhanan, ug uban pang ahensya kinahanglang mosunod sa usa ka master plan.
Para sa mga dapit gawas sa Metro Manila, gituldokan niya nga ang mga programa sa DPWH kinahanglang iplano subay sa tibuok river basin, sama sa Pampanga, Agno, Cagayan, Bicol, Agusan, ug Mindanao river basins, imbes nga subay sa mga congressional district, probinsya, o munisipyo.
Gihimong ehemplo ni Pangilinan ang Central Luzon ug ang Pampanga River Basin, diin ang pagplano kinahanglang magsumpay-sumpay sa mga agianan sa tubig nga nag-apekto sa Nueva Ecija, Pampanga, Bulacan, ug Tarlac.
Dugang pa niini, nanawagan ang senador og usa ka pampublikong database nga naglakip sa pundo, kontraktor, espesipikasyon, timetable, ug master-plan component sa matag proyekto.
Gipadayag usab niya nga ang pagpili sa mga proyekto kinahanglang magsubay sa mga hydrological study, hazard map, ug datos gikan sa Project NOAH ug uban pang siyentipikong institusyon, kauban ang pagpahigayon og independent audits aron masiguro nga ang mga proyekto nakatabang gayud ug wala makapagrabe sa baha sa ubang dapit.
Gipasabot ni Pangilinan nga kini nga mga baruganan dugay nang girekomendar sa World Bank, ADB, JICA, NEDA, NDRRMC, ug Project NOAH aron ma-overhaul ang kasamtangang sistema ug mapalitan og master plan nga adunay transparent nga accountability ug masukod nga mga resulta.
