Gipahimangnoan ni Presidente Ferdinand Marcos Jr. ang mga opisyal sa gobyero nga adunay kalambigitan sa iyang giingon nga kaylap nga kurapsyon sa mga flood control projects sa nasud.
Gihatagan og gibug-aton sa Presidente nga ang maong mga kalihokan dili lamang pagpangawat sa kuwarta sa publiko kondili sa kaugmaon usab sa mga Pilipino, ilabi na nga mamahimo kini nga pahimuslan pa sa mga sunod nga henerasyon.
Matod niya nga angayng maulaw ang mga nalambigit sa mga pamilyang apektado sa baha ug sa mga bata nga makapanunod sa utang tungod sa maong kurapsyon.
Samtang sa laing bahin, gawas sa mga nagkainit nga isyu nga nahisgutan karon sa nasud, nahisgutan usab sa Presidente ang National Expenditure Program (NEP), diin nagpasidaan kini nga dili maaprobahan ang gisugyot nga 2026 national budget, nga wala nakaangkla sa mga tumong sa kalamboan sa gobyerno para sa mga Pilipino.
Matod sa Presidente, dili mausab ang iyang baruganan sa maong isyu, bisan pa kung mogamit ang nasud og reenacted budget alang sa sunod tuig.
Ang gisugyot sa gobyerno nga National Expenditure Program (NEP) alang sa tuig 2026 anaa sa PhP6.7 trilyon.
