Igo nalang niingon ang kanhi Agriculture Secretary ug Feredation of Free Farmers Chairman nga daw ‘pampapogi’ o publicity stunt ang pag-isyu ni Presidente Ferdinand R. Marcos Jr. sa Executive Order (EO) 100 nga nagtakda og floor price alang sa palay ug nag-activate sa mga trigger mechanism sa implementasyon niini aron mapanalipdan ang mga mag-uuma gikan sa pag-ubos sa farmgate prices.
Kini ang gipaambit ni Leonardo Montemayor gumikan sa dyutay nga epekto niini sa mga mag-uuma bisan paman nga ang tumong sa pagpirma aron masiguro ang mas taas nga produksiyon sa pagkaon, lig-on nga presyo, ug mas maayong panginabuhian sa mga mag-uuma ug mangingisda.
Ubos sa EO, ang Department of Agriculture (DA) gimandoan sa pagtino, pagtakda, ug pag-adjust sa floor price sa palay alang sa government procurement basi sa cost of production, kasamtangang presyo sa merkado, makatarunganon nga margins sa mga mag-uuma, ug ang kaayohan sa mga producers ug konsumidor.
Mahimo usab nga ikonsiderar sa DA ang ubang mga hinungdan, lakip ang mga emerhensya o kalamidad nga makaapekto sa supply chain sa bugas ug produksiyon sa palay, pagdagsa sa mga imported nga produkto nga mahimong makapamenos sa presyo sa farmgate sa palay, kalit nga pag-ubos sa global prices nga mahimong makaapekto sa gibanabana nga landed cost sa bugas ug ang kapasidad sa gobyerno sa pagpalit og palay sa kompetisyon nga presyo ug pagdumala sa interbensyon sa merkado.
Apan, matud ni Montemayor nga ang maong EO kay aplikable lang sa mga national ug local government ug dili kini sakop ang mga private citizens ug private traders.
Hinuon, nipasalig ang Federation of Free Farmers nga padayon ang ilang pagduso sa mga polisiya ug mga programa nga gipanglatid ang mga tinud-anay nga kauswagan ug proteksyon alang sa kaayohan, dili lang sa mga mag-uuma apan tibuok katawhan sa Pilipinas.
Lakip na niini ang ilang kampanya sa anti-smuggling nga gipangulohan ni Sen. Kiko Pangilinan ug sa buhatan sa Department of Agriculture nga nakigbisog usab sa kurapsyon sa nasud.
