Adunay puhuran nga makanselar ang gipaabot nga Fluvial procession sa ika-461 kapistahan ni Sr. Sto. Niño de Cebu sa adlawng Sabado, Enero 17, 2026.
Kini kung sa higayong makasinati og bati nga dagan sa panahon ang dakng bahin sa Metro Cebu particular na sa Mactan Channel diin nagsubay ang routa sa Fluvial procession.
Sumala pa sa pakighinabi sa Bombo Radyo Cebu News Team kang Captain Jerome Lozada, ang Station Commander sa Philippine Coast Guard Central Visayas (PCG-7) nga mudesisyon lang sila sa pagkanselar sa prosesyon sa kadagatan nga nagpatunga sa isla sa Mactan ug Sugbo para sa kapistahan sa Fiesta Señor karong tuiga kung ang PAGASA magpahibalo sa posibleng epekto sa mga weather system nga makaapekto sa dakbayan sama nalang sa ginabantayang Low Pressure Area (LPA).
Matod pa niini nga ang gidaghanon sa mga sakayang pandagat sa usa ka dapit kay peligroso kung makaisa ang Tropical Cyclone Wind Signal no. 1 nga awtomatikong ginadili ang paglawig sa kadagatan sa bisag unsang gidak-on aron mapanalipdan ang kaluwasan sa kadaghanan.
Gani hugot ang koordinasyon sa natahasang Galleon sa karong edisyon sa Fluvial procession nga mao ang Lite Ferry 10 nga gikan sa shipping company nga Lite Ferries ngadto sa PCG-7 aron hapsay mahikay ang prosesyon sa kadagatan alang sa kapistahan sa Sr. Sto. Niño de Cebu diin adunay inisyal nga sumada sa 250 ka mga sakayang pandagat ang musalmot niini.
