Duha ang namatay samtang tulo ang nalanding sa tambalanan tungod sa giingong food poisoning sa Barangay Tapilon, lungsod sa Daanbantayan sa amihanang Sugbo.
Kini ang gikompirmar ni Tapilon Barangay Captain Mark Anthony “Mawi” Luche, kinsa midugang nga ang mga biktima mga managsuon.
Matod ni Luche nga ang mga nangamatay nagpangidaron og 1 ug 2, samtang ang usa ka 6-anyos, 4-anyos, ug 5-anyos ang nadala usab sa tambalanan tungod sa kalibanga ug pagsuka.
Sa wala pa sila gidala sa Daanbantayan District Hospital, si Luche niingon nga ang mga biktima nangaon og alimango ug kinhason alang sa panihapon niadtong Miyerkules, Enero 25, 2023.
Patay gilayon ang 2 anyos nga biktima samtang ang 1 anyos nga biktima gideklarar nga dead on arrival sa tambalanan.
Dugang pa, nga namatay ang duha tungod sa cardiac arrest ug dehydration.
Sa pagkakaron, si Luche niingon nga ang Department of Health (DOH) ug ang municipal health office nagsusi na sa maong insidente.
Matod niya nga gawas sa pagkaon nga gikaon sa mga biktima, nagkuha pa sila og mga sample sa tinubdan sa tubig sa maong dapit.
Dugang ni Luche nga anaa na sa estable nga kahimtang ang laing tulo ka mga biktima.
