NEGROS ORIENTAL-Pagbalik sa sabakan sa gobyerno ang nakita karong motibo sa pagpusil patay sa kanhi rebelde ug usa ka mag-uuma sa may Arellano Street,
Brgy. Poblacion lungsod sa Zamboanguita Negros Oriental kagahapon sa hapon.
Naila ang mga biktima nga sila si Weny Alegre, 37 anyos ug FeliminoJanayan,parehong residinte sa Brgy. Calango sa naasoy nga lungsod.
Matud sa hepe sa Zamboanguita Police Station nga si Police Captain Danilo Santillan nga samtang padung na nga mu-pauli ang duha sakay sa motorsiklo, kalit matud pa nga mibutho ang upat ka mga lalaki nga nagsakay sa duha ka scooter dayon pusil sa mga biktima sa makadaghang higayon.
Tungod kay gipauwanan ang duha og bala, hagba ug patay kini diha-diha dayon.
Dali matud pa dayon nga miikyas ang mga mamumuno nga nakajacket, nakakalo ug nakamaskara. ug misyagit pa nga “Mabuhay ang NPA”.
Nasuta nga si Alegre ang kanhi aktibong miyembro sa NPA samtang si Janayan ang presidente sa Unites Calango Farmers Association. Boot na matud pa nga magbago sa iyang kinabuhi si Alegre mao nga mibiya na kini sa walhong grupo.
Nakuha gikan sa crime scene ang 11 kabhang sa 45 caliber pistol ,duha kabhang sa 9mm ug lain pang kabhang sa wala pa matino nga armas.
