Gihatagan sa International Criminal Court (ICC) og permiso si kanhi Presidente Rodrigo Duterte nga dili motambong sa unang status conference alang sa iyang crimes against humanity trial karong Mayo 27.
Kini nahitabo human gipahibalo sa iyang legal team sa tribunal nga gusto sa kanhi presidente nga i-waive ang iyang katungod sa pagtambong.
Sa pito ka panid nga mando nga gipetsahan og Mayo 22, gitugotan sa ICC Trial Chamber III ang hangyo sa defense team ni Duterte nga dili motambong ang kanhi presidente sa status conference sa The Hague.
Sumala sa Trial Chamber, nangatarungan ang depensa nga ang mandato alang sa usa ka akusado nga motambong sa pagdungog magamit lamang sa aktuwal nga trial ug dili sa status conference.
Giaprubahan sa tribunal ang hangyo apan gimandoan ang mga abogado ni Dutertre nga mosumite og sinulat nga waiver sa Lunes, Mayo 25, nga personal nga gipirmahan sa kanhi presidente.
Samtang, gibalibaran sa ICC ang hangyo ni Atty. Gilbert Andres, usa sa legal counsel sa mga biktima, nga moapil “remotely” sa status conference. Sumala sa korte, tungod sa pisikal nga presensya sa mga miyembro sa iyang team, ug sa mga limitasyon sa luwas nga mga koneksyon sa layo sa mga pribadong sesyon, wala kini gitugot.
Samtang, gibasol sa kanhi tigpamaba sa presidente nga si Atty. Harry Roque ang International Criminal Court (ICC) taliwala sa giingong plano nga bungkagon ang tribunal.
Bisan pa man, nagpahayag usab og kasubo si Roque tungod kay usa siya sa mga nagpasiugda sa ICC nga magsilbing dangpanan sa mga biktima kung ang mga lokal nga korte dili molihok.
Kung bungkagon ang ICC, si Roque miingon nga “ang kanhi Presidente Rodrigo Duterte wala sa husay ug kinahanglan nga buhian sa labing madali.”
Gihimo sa abogado ang pahayag taliwala sa giingong deklarasyon ni US President Donald Trump nga ang US, China ug Russia nagtinabangay aron bungkagon ang ICC.
