Nagpabiling positibo ang kampo ni kanhi Presidente Rodrigo Duterte bisan paman nga ang kanhi dunay mga gibati nga dili mayo sa iyang panglawas sulod sa Scheveningen prison complex diin kini natanggong.
Ingon man nga samtang anaa pa sa detensyon sa The Hague, Netherlands, ang kampo ni kanhi Presidente Rodrigo Duterte miinsistir nga si Presidente Ferdinand Marcos Jr. ang nagpaluyo sa pagpondo sa mga saksi batok kaniya sa International Criminal Court (ICC).
Kini ang bag-ong anggulo nga gipaambit sa iyang lead defense lawyer nga si Nicholas Kaufman.
Samtang, si Duterte nagsang-at og pormal nga waiver sa Pre-Trial Chamber (PTC) I aron dili makatambong sa hearing karong Biyernes nga magrepaso sa status sa iyang detensyon, nagdumili usab siya sa pagtambong bisan pinaagi sa videoconference.
Sa iyang gipirmahan nga dokumento, si Duterte miingon nga siya adunay hingpit nga pagsalig sa iyang ICC legal team nga morepresentar kaniya sa hearing.
Ang kanhi presidente anaa sa detensyon sulod sa halos usa ka tuig human siya gidakop niadtong Marso 11 tungod sa tulo ka ihap sa mga krimen batok sa katawhan.
Diin ang kaso naggikan sa kamatayon sa 78 ka mga indibidwal ubos sa iyang kontrobersyal nga gubat batok sa droga.
Niining bahina, ang depensa gikatakda nga mopresentar sa mga merito niini karong adlawa.
