Gitataw sa Department of Foreign Affairs (DFA) nga mahimo gihapon nga tabangan sa nasud si kanhi Presidente Rodrigo Duterte ug ang iyang pamilya isip mga Pilipino.
Gipasabot ni DFA Undersecretary Eduardo de Vega nga sa dihang gidala ang kanhi presidente sa The Hague, Netherlands kay gipabilin niya ang iyang pagka-Filipino citizen, ug aduna pa siyay katungod sa bisan unsang tabang nga mahatag sa DFA.
Sa pangutana kon si kanhi president mamaahimo pa bang manumpa sa Philippine Embassy sa The Hague, Netherlands sa kadaugan niini isip Davao City Mayor, matod ni De Vega nga mahimo kini sa embahada tungod kay ang maong buhatan nagsilbi nga extension sa gobyerno sa Pilipinas.
Hinuon, matod niya nga usa gihapon ka dakong pangutana kon tugotan ba sa International Criminal Court (ICC) ang kanhi presidente nga makabiya ug makabiyahe sa embahada aron manumpa isip bag-ong napili nga mayor sa Davao City, ilabi na nga dili na miyembro sa ICC ang Pilipinas.
Ang opisyal sa DFA mikutlo sa legal nga teorya nga ang gahum ug awtoridad sa embahada limitado lamang sa embahada.
Nagpasabot kini nga kinahanglang dad-on si Duterte sa embahada sa Pilipinas aron manumpa sa katungdanan.
Kahinumduman nga mibulsa na sab og landslide nga kadaugan ang kanhi presidente human midagan pagka-mayor sa Davao City kini bisan pa sa iyang pagkatanggong sa ICC detention facility atol sa kataas sa kampanya hangtod sa piniliay niadtong Mayo 12.
Samtang, anaa ra sa samang dapit sa The Hague ang embahada sa Pilipinas ug ang headquarters sa ICC.
