Gipangandaman na sa kagamhanan sa lalawigan sa Sugbo ang paghatag og fuel subsidy alang sa mga drayber sa tibuok probinsya aron matabangan sila sa nagpadayong pagsaka sa presyo sa lana.
Sumala ni Cebu Gov. Pamela “Pam” Baricuatro, anaa na sa proseso ang iyang opisina sa pag-andam niini, bisan wala pa matino ang eksaktong kantidad nga ipang-apod-apod.
Gihangyo sa gobernador ang mga mayor nga bantayan og maayo ang pletihan sa ilang tagsa-tagsa ka dapit, ilabi na kadtong mga habal-habal, aron malikayan ang kalit nga pagsaka sa presyo nga moigo sa bulsa sa mga sumasakay.
Tumong ni Baricuatro nga ilhon og maayo kon kinsang sektor ang labing apektado, diin iyang gikuha nga ehemplo ang mga mananagat nga nagsalig sa bangka ug ang mga gagmayng transport operators.
Pinaagi sa pakig-alayon sa mga Local Government Units (LGUs) ug nasudnong ahensya, tinguha sa probinsya nga mahimong paspas ang pagtubag sa mga reklamo ug masiguro nga balanse ang pagpanalipod sa mga sumasakay ug pagsuporta sa mga drayber.
Kini nga lakang uyon usab sa pahinumdom sa LTFRB-7 nga dili magpataka og pasaka sa pletihan kon walay opisyal nga pagtugot gikan sa board.
Sa pikas bahin, gikatakdang makadawat og ₱5,000 nga fuel subsidy ang mga drayber sa Public Utility Vehicles (PUV) sunod semana gikan sa nasudnong kagamhanan.
Kini human mimando si Presidente Ferdinand R. Marcos Jr. og hinanaling tabang tungod sa epekto sa tensyon sa Middle East sa presyo sa lana sa merkado, samtang ang DSWD naggahin na usab og ₱30 bilyon alang sa mga drayber ug uban pang bulnerableng sektor.
