Nagpagawas ang Department of Trade and Industry (DTI) sa 2025 nga “Gabay sa Pamimili ng School Supplies,” tukma sa panahon sa pag-abli sa klase karong umaabot Hunyo 16, 2025.
Ang pinakabag-o nga giya sa presyo sa suplay sa eskwelahan, nga naglangkob sa 195 ka mga produkto ubos sa 12 ka mga kategoriya, adunay 29 ka mga butang nga gitaho nga adunay lower prices, 17 ka mga butang nga adunay higher prices, ug 101 ka mga butang nga adunay stable prices. Ang listahan nagpaila usab ug 48 ka new items.
Upat ka mga notebook items ang gipaus-os sa presyo nga PHP5 ngadto sa PHP10, samtang 24 ka pad papers mius-os sa presyo niini og PHP1 ngadto sa PHP6. Ang usa ka lapis nga brand giputol ang presyo sa PHP5.
Matud pa ni DTI Secretary Ma. Cristina Roque, samtang gasubay sila sa pag-apas sa Bagong Pilipinas agenda ni Presidente Ferdinand R. Marcos Jr., ang ilahang buhatan komitado sa pagsiguro nga ang mga katawhan adunay access ug sources sa mga gamit sa mga magtutungha subay sa makatarunganon ang presyo.
Sa 2025 nga edisyon sa price guide, ang presyo sa mga notebook gikan sa PHP15 ngadto sa PHP52, pad paper gikan sa PHP15 ngadto sa PHP48.75, ug mga lapis gikan sa PHP11 ngadto sa PHP24.
Ang mga ballpen anaa gikan sa PHP3 ngadto sa PHP33, mga sharpener gikan sa PHP15 ngadto sa PHP69, ug mga ruler gikan sa PHP16 ngadto sa PHP39.
Depende usab sa gidaghanon, ang presyo sa crayons gikan sa PHP12 ngadto sa PHP114 samtang ang presyo sa eraser gikan sa PHP4.50 ngadto sa PHP20 depende sa gidak-on.
Ang pinakaulahing guide sa presyo sa suplay sa eskwelahan mahimong ma-download usab gikan sa DTI website.(Bombo Irene Ardiente)
